प्रशान्त निरौला
लेटाङ, १४ मंसिर । लेटाङ नगरपालिका, पूर्व नेपालको एक महत्वपूर्ण पर्यटकीय स्थलको रूपमा परिचित छ। यो नगरपालिका आफ्नो प्राकृतिक सुन्दरताले सजिएको छ, जहाँको हावापानीले आगन्तुकलाई सधैं स्वागत गर्दछ। यहाँका रमणीय पहाडी क्षेत्र, हरियालीले ढाकिएका वन र चिसो हावाले कुनै पनि पर्यटकलाई आकर्षित गर्न सक्छ।
लेटाङमा अवस्थित राजारानी मन्दिर, किसे झरना, कोलुङ झरना, र समलाडाँडा जस्ता स्थानहरू प्रकृतिप्रेमी र धार्मिक पर्यटकका लागि विशेष आकर्षण हुन्। यस्तै, भोगटेनी र वारङ्गी क्षेत्रहरू पनि प्राकृतिक सौन्दर्यले भरिएका स्थान हुन्, जहाँको सौन्दर्यमा हराउन आउने पर्यटकहरूको कमी छैन।
तर, यत्रो सम्भावना हुँदाहुँदै पनि लेटाङको पर्यटन उद्योगले अपेक्षित उचाइ लिन सकेको छैन। यसको मुख्य कारण हो— यातायातको समस्या। लेटाङ(वारङ्गी सडक, लेटाङ(भोगटेनी सडक र जाँते(ज्यामिरे सडकको खराब अवस्था यहाँको विकासमा प्रमुख बाधक बनेको छ। यी सडकहरूको कालोपत्रे नहुनुका कारण पर्यटकले यहाँ पुग्न असहज अनुभव गर्ने गरेका छन्। परिणामस्वरूप, झापा, मोरङ, सुनसरीलगायतका नजिकका जिल्ला तथा अन्य स्थानबाट आउने पर्यटकको संख्या घट्दै गएको छ।
पर्यटन फस्टाउनका लागि सडक पूर्वाधार अत्यावश्यक हुन्छ। यातायात सहज नहुँदा प्राकृतिक सम्पदाले मात्र पर्यटक तान्न सम्भव हुँदैन। यहाँको स्थानीय सरकार र सरोकारवालाहरूले पर्यटनमैत्री पूर्वाधार विकासमा जोड दिनु जरुरी छ।
लेटाङको पर्यटनले पक्कै पनि आर्थिक लाभ दिनसक्छ, तर यसका लागि तत्कालै यी सडकहरूको स्तरोन्नति गर्नुपर्ने देखिन्छ। यदि समयमै पहल गरिएन भने लेटाङको अपार पर्यटकीय सम्भावना ओझेलमा पर्ने खतरा रहन्छ।
यो चुनौतीमात्र होइन, अवसर पनि हो। स्थानीय सरकार, निजी क्षेत्र र समुदायले एकसाथ आएर पूर्वाधार सुधारमा ध्यान दिए लेटाङलाई देशकै पर्यटकीय गन्तव्य बनाउन सकिन्छ। सडक मर्मत र स्तरोन्नतिका काम समयमै सम्पन्न भएमा पर्यटकहरूको आगमनसँगै यहाँका स्थानीय बासिन्दाको आर्थिक अवस्था पनि उकासिनेछ। लेटाङको प्राकृतिक सौन्दर्यको उज्यालो पर्यटनका माध्यमबाट देशभर मात्र होइन, अन्तर्राष्ट्रियस्तरमा समेत फैलिने दिन टाढा छैन।