लेटाङ, ४ पुस । घरमै बसेर पनि नगरपालिकाले प्रवाह गर्ने सेवाबारे बुझ्न सकिने गरी उत्तरी मोरङको लेटाङ नगरपालिकाले मोबाइल एप्स सेवा सञ्चालनमा ल्याएको छ ।

एन्ड्रोइड मोबाइलको प्लेस्टोर एप्लीकेशनमा गएर लेटाङ म्युनिसिपालिटी टाइप गरी इन्स्टल गरी हेर्न सकिने लेटाङ नगरापलिकाका सूचना प्रविधि अधिकृत ओमप्रकास पौडेले जानकारी दिनुभयो ।

सो मोबाइल एप्लीकेशनको एक कार्यक्रमका बीच नगरपालिका प्रमुख शंकर राईले बुधवार विधिवत रुपमा शुभारम्भ गर्नुभयो । मेयर राईले सूचना तथा जानकारी र सेवा हेर्न सकिने गरी मोबाइल एप्स सञ्चालनमा ल्याएको बताउनुभयो ।

एप्स्बाट नगरपालिकाको सेवा, कार्यक्रम तथा परियोजना, सूचना तथा जानकारी, सुझाव तथा गुनासो, समस्या दर्ता, वडाका विवरण, महत्वपूर्ण स्थानको जानकारी र आपत्कालीन टेलिफोन नम्बरको जानकारी लिन सकिने बताइएको छ । यसअघि नगरपालिकाले व्यत्तिगत घटना दर्ता तथा सामाजिक सुरक्षा प्रणालीलाई र ईहाजिरी सञ्चालनमा ल्याइएको थियो ।